【番茄焗雞脾飯】 GEG0169

2016.10.31  GEG0169

今日裝修師傅繼續為我屋企執漏埋尾，Mrsfancy無聊下又搵世藝打發時間，究竟搞邊科？就係...............番茄焗雞脾飯喇。

材料:

白飯兩碗、雞脾兩隻、番茄細兩個、雞蛋兩隻、芝士一片、蒜蓉少許

雞脾醃料:

黑胡椒、鹽、雜香草 (全部適量)　

番茄汁:

茄膏1湯匙、茄醬2湯匙、糖1湯匙、鹽少許、水半杯。(註：Mrsfancy額外加咗1湯匙無花果醋，使帶點酸甜香味，無亦無妨。)

做法: 

1) 決定做焗飯當然要先煲飯，因用新鮮飯炒底，煲飯下水比例要比平日少，令白飯較乾身。

2) 雞脾洗淨用黑胡椒、鹽和香草醃約至少1小時，備用。

3) 白飯用雞蛋和少許咖哩粉炒勻，加入鹽調味，完成後放入烤盤備用。

4) 雞脾煎香兩邊至七成熟左右，將雞脾放在飯面上。

5) 爆香蒜蓉及番茄，加入調味汁煮一會至翻滾，將它淋在雞脾上。

6) 芝士切條狀再鋪在番茄汁上，將半製成品焗飯烤盤放入已預熱嘅焗爐內。(預熱焗爐：調教上下火、200度、10分鐘。)

7) 以220度焗25分鐘至雞脾全熟即可。

小心熱呀~~~完成。

Mrsfancy Love Life 網頁之文章及相片內容，在未經 (本人Mrsfancy) 同意下，作出抄襲、複製及作為其他商業用途，如有發現定必以法律責任追究，敬請自重。 

【簡單介紹氣血】 GEG0168

2016.10.28 GEG0168

成日聽到話氣血不足，究竟乜嘢叫做氣血？氣血喺邊樹嚟？
簡單地講，氣血係需要靠自己進食食物來轉化成為營養和能量。氣、血加埋津液就係維持人體生命嘅基本物質，缺一不可。

【氣】有推動人體動力和激發人體生長作用，唔夠氣，人就無神無氣，容易受病毒侵襲。氣亦係推動血液在血管內作正常循環嘅動力，若唔夠氣，就唔夠力推動血液向上走（頭部）或向下到你嘅腳尖部分。

 【血液】作用係負責輸送營養到全身各臟腑和經絡以得到滋養，如果缺血，就會影響神志活動，人會出現坐立不安、失眠，精神恍惚及有暈眩等症狀。

【津液】指人體內一切水液嘅總稱，包括水份、汗、尿液和分泌物。津液作用係滋養身體和肌膚。例如夏天流汗。出汗其實係一個途徑帶走我哋嘅氣，所以夏天除咗要多飮水，亦需要食d參補氣。

以上都需要從健康飲食著手而生，只要其中一樣不足，都會致令身體出問題。又簡單地講，只要我哋擁有一個功能好嘅脾胃，就能夠製造出正常嘅氣、血、津液去維持身體一切運作所需。要有健康嘅脾胃，最好少食生冷及寒涼食物，因生冷寒涼會令脾胃功作停頓而致對吃下嘅食物唔吸收啊！

Mrsfancy想介紹一個坊間常見嘅養生茶「黨參南棗龍眼肉焗茶」，對一d氣血虛弱及體弱人士（如我）亦可以飮用。

【黨參】有補氣功效，因比其他參類平和，所以適合一年四季食用，尤其喺春夏季可用來補氣。假若唔知自己可食那種參類，選用黨參一定穏震。

【南棗】補血，比紅棗性質平和，因有啲人食紅棗會感到燥熱，甚至出現喉嚨痛，所以用南棗較好，但南棗價錢較貴。

【龍眼】肉安神補氣血，怕燥一樣唔好落咁多。

材料：

黨參、南棗、龍眼肉、薑片、少少片糖。加入沸水焗水飲用。

**以上藥用飲料為建議及作參考，網友宜留意自己會否對某些食材過敏或有不良反應，服用前應向相熟醫師查詢是否適合飲用。


Mrsfancy Love Life 網頁之文章及相片內容，在未經 (本人Mrsfancy) 同意下，作出抄襲、複製及作為其他商業用途，如有發現定必以法律責任追究，敬請自重。 

【潤燥_糖水】 GEG0167

2016.10.06 GEG0167

一年四季之中，秋季是最適合以糖水(甜湯)來滋潤身體的。我們要在立冬前盡量做滋潤功夫(尚餘約一個月)，並不是說冬季不可以吃糖水，但冬季的特性是為身體進行大補的季節，如果身體一直虛弱或坐月時補得不足，冬季就是補身的機會，錯過後又要等成年了。

之前講過人需要配合四時而生，秋天的特性是乾燥，肺在五行中屬金(即木火土金水)，金主白色，季節代表秋季，亦因肺主皮毛，皮膚毛髪靚唔靚完全關個肺事，所以需要以潤肺食物來幫助潤肺，而秋季就是進行滋養功夫的最好時機。

那什麼是潤燥？
有無覺得自踏入秋天後喉嚨特別乾𠴱、咀唇乾燥、眼仔澀澀淚水少，以及皮膚掹緊或脫皮，這個就是秋季的乾燥模式，令人更容易上火、曝燥，津液因而流失，所以我們好需要在這段期間去滋潤身體防燥，也要多補充水份。

這時候究竟可以吃些什麼類型糖水(甜湯)？
白色食材固然是基本配搭，故可以㷛木瓜雪耳南北杏、冰糖燉雪梨（有咳可加川貝母）、淮山雪耳蓮子白合紅棗，矜貴點可弄花膠燉鮮奶等等。最近上課，老師極力推介這時段以龍眼肉和栗子做糖水，說只用這兩材料已好好味又夠滋潤。不過大定請記著，「健脾」是我們一年四季都需要做的重要項目，只因脾胃唔好，就算是山珍海錯，我們都吸收不到啊。

以下簡單介紹一款「木瓜雪耳南北杏糖水」。

材料：

木瓜(2個)    雪耳(1個)    南北杏(1湯匙)    冰糖(適量)    水(2公升)

做法：

1) 雪耳用清水浸泡，可換1至2次清水，浸泡後切塊。木瓜去皮、去核和切塊。

2) 水注入鍋內以大火煲滾，之後將所有材料放入鍋中，待水再翻滾收細火煲約45分鐘至1小時，最後加入適量冰糖調味即可食用。(期間我有酌量加入水份，視乎鍋內水份多少)

**以上餐單為建議及作參考，網友宜留意自己會否對某些食材過敏或有不良反應，服用前應向相熟醫師查詢是否適合食用或飲用。


Mrsfancy Love Life 網頁之文章及相片內容，在未經 (本人Mrsfancy) 同意下，作出抄襲、複製及作為其他商業用途，如有發現定必以法律責任追究，敬請自重。